مش انتي دلوقتي بتكلميني وانتي شايلة الحجاب؟
يعني شعرك دلوقتي سايب كده وللا عاملاه ديل حصان؟
محرجة؟ خلاص سيبك
طيب بقوللك إيه يا بت انتي
ياللي بتوحشيني جدا
أنا دلوقتي بشرب شاي بالنعناع
ونفسي بجد
أشرب منه معاكي
أكيد ده ينفع في كافيتيريا نهارية
هيبقى جميل
ويكون معانا كتب وورق وام بي فور
ومعانا قعدة تكون مِبرطعة ومُستكينة
طيب تصدقي بقى
فكرت دلوقتي حالا بس
إنه ينفع عندي هنا
إنه ينفع عندي هنا
يااااه جميل جدا
قدام ترابيزة الكمبيوتر
وحطي رجل على رجل
وبنطلون جينز أزرق غامق
وانتي ع الكرسي الفاضي اللي على يميني ده
وواخده اتجاه بزاوية الرؤية
ناحية الشاشة الفلات
ومُستقرة الاستناد للخلف
(ببسمة داخلية دافية أو خارجية كريمة، (خلليكي كريمة أحسن
الكباية ف إيدك الشمال
وهتمدي إيدك اليمين تاخدي الماوس من إيدي
(بعد ما ترفعيها من عليه، (يا لهوي يا جدعان
تشغللي الأغاني اللي بتحبيها
وتدخلي على النت
على صفحاتك المفضلة
من عندي هنا
وطبعا بتشربي لحظتها الشاي بالنعناع
المشروب الحقيقي بتاعي
اللي ساكنة فيه يومياتي
اللي غير القهوة والعصاير تماما
اللي بينفعوا بس في اللقاءات الرسمية
أو اللقاءات العاطفية المقلمة الأظافر
28 comments:
مزمز باشا
إيه ياعم الدماغ دى
ربنا يوفقك ف مطلبك ياسيدى
وتعيييييييييييييييييش
سلام
TO Beeeee Or No To bee.
ikar
أنا أفضل ديل الحصان
كما أفضل الشاي بالنعناع
حاسس إنها ناقصة هسة تفاصيل
إنت اللي مش عايز تكتب؟
تحياتي
جميلة جداا يا مزمز
جميلة فعلا
لو قاصد توزنها فهي مش موزونة لكن فيها مزيكا ما مش عارفة مصدرها
انا كمان بعز الشاي بالنعناع جدا
محمد:
ده من ذوقك بس يا جميل
يا رب يا سيدي
:)
إيكار:
طب وإيه اللي دخل النحل في الموضوع؟
هههه
منور
بيشوي:
أنا أيضا أحب ديل الحصان
ساحر ومنذ أن كنت طفلا أحبه
اممممم
هي التفاصيل دي كفاية ف رأيي
أنا مش مش عايز أكتب ولا حاجة
أنا عايز أكتب جدا طبعا
بس هو ده اللي جه معايا
تحياتي
:)
ريفندل المنقرضة فعلا:
منورة يا جميل
الله يخلليكي يا رب ميرسي على رأيك
أنا مش قاصد أوزنها خالص هي مفيهاش أوزان ولا قوافي يمكن إيقاع خفيف بس
الشاي بالنعناع حاطه على البروفايل هنا من الاهتمامات بتاعتي
ههههه
منورة
:))
اية الكلام الجامد دة
بجد حلوووووووووووة موت لدرجة انك عيشتنى اللحظة وخصوصا الشاى بالنعناع
تسلم ايدك
تحياتى
:)))
الله
لا بجد حلوة اوي اوي
عارف لما تبدأ البوست مستغرب ومش عارف هتحبه ولا لا
تبتسم واحدة واحدة مع كلمة عجبتك
تنزل سطرين يعجلك اكتر وتبتسم اكتر
علي بال الاخر تبقي مش عاوزة يخلص
برافو بجد
شاي بنعناع في الحر دة!!
سايب ولا ديل حصان
يخرب عقلك
انت معدّي
معلم والله يا ريّس، أول جملتين مالهمش حل
معدّيين بجد!
ربنا يكرمك ويوفقك يا رب (f)
خيال جميل
ولحظة نجحت انك تخليني اعيشها
استمر
تحفة يا معاذ
من أحلى ما قريت لك
كلهابساطة نفسية شديدة
و احلى معنى فى الحب
متمثل فى طبلك لمشاركة حبيبتك كل تفاصيل حياتك الصغيرة
فكرتنى اوى بشعر ملك العامى الحلمنتيشى
عمر طاهر" يا ريت تزود من اللون ده اوى لاننا مفتقدينه
حلو اوي يا معاذ خطفني فعلا
بجد و الله انا فاكرك كاتب الكلام هتتريق عليه
!!!!!!!!!!!!!!!!
دة اسمة على فكرة غزل صريح
و ميصحش اصلا انسان المفروض انه مسلم يكتبة
عارف الكلام اللى انت كاتبة دة المفروض حتى لو فكرت فية من غير ما تقصد
تستغفر ربنا و تقول ايه اللى انا بفكر فية ده ..
ربنا يقوينى
انما انك تكتبة هنا على انه فن !!!!!!!!!!!!
و الله انا ذهلت ...
بجد ربنا يهديك
ارجو ان ردى يكون له اى تأثير و ميكونش زعلك انا بس حبيت اقولك الصراحة مش بس انافقك وخلاص زى الباقى
سلام
ومن الشاى (بالنعناع )ما قتل
ikar
كل حاجه انحدرت !!
كان فاضل الأدب و فروعه
و خاطرتك التي لا ترقي إلي مستوي الأدب في اي فرع من فروعه تسيء إلي كل صيغ الكتابه باللغة العربية
هي دي ايه يبني ؟؟!؟!
قصة قصيرة و لا خاطرة ؟؟
لا لغة و لا اسلوب و لا فكرة و لا بناء أدبي ؟!؟
انا اعرف ادباء بيكتبوا كلام سافل بس بصيغ ادبيه محترمة
لكن انت كاتب كلام سافل في صيغه اسفل منه !!
يعني الفكرة زيرو
الأسلوب زيرو
كان ممكن حاجه منهم تخلينا نغفرلك التانيه
لكن للأسف مفيش اي حد بيفهم في الأدب هيغفرلك
و الله و لا حتي اللي بيفهموا في قلة الأدب !!
نبض اسكندرية:
ميرسي على رأيك وعلى ذوقك يا قمر انتي
اهم حاجة انك تعيشي اللحظة
ده حتى كان أهم حاجة ليا أنا شخصيا اني أعيشها
تحياتي ليكي
ساسوو:
عاش من شافك ده أولا
ومنورة ده ثانيا
ومبسوووووط برأيك جدا جدا جدا ده ثالثا
أنا برضه تصدقي ف أول سطرين مكنتش عارف هاكتب ايه أصلا
ميرسي عالتشجيع ده
:))
سارة:
أنا قاعد في أوضة رطبة وجميلة
مع الشاي بالنعناع بيكون الجو غير الخارج خالص
:)
نورتيني
وتعالي تاني
عمرو فهمي:
متشكر يا باشا على التشجيع الجامد ده
طب لازم يخرب عقلي يعني؟
ميخلليهولي شوية؟
:)))
منورني في أول زيارة ويارب تيجي على طوووووول
عمر باشا:
معلم معلم يلا هو فيه أحسن من المعلمين :)
ميرسي على الكومنت الجميل والعاء الجميل برضه
وبرضه منورني ف أول زيارة وتعالى على طووووووول
:))))
مصطفى:
يا باشا رأيك أسعدني جدا ويعنيلي الكثير جدا حيث أنك شاعر جميل جدا
منور :)
حنان:
دايما رافعة معنوياتي والله يا قمر
ميرسي يا جميل
انتي فعلا قلتي رأي أنا حاسس ان هو ده اللي انا كنت عايز أعمله في النص ده
أنا بكتب حسب الحالة خالص
يعني يطلع كده مرة أو يطلع بالفصحى مرة
أديني لسه بجرب وبالعب وبادور على صوتي في النهاية
منوراني بجد دايما
:))
نهىىىى:
يااااااه
مبتجييش من زمااااان
مبسوط أوي بزيارتك والله يا نهى يا جميلة
ومبسوط برأيك أوي أوي أوي
بس مين ده اللي خطفك؟
ده انتي ف مدونتي يعني ف حمايتي :)
إيكار:
هيهيهيهيهيهي
الشاي بالنعناع فيه سم قاتل
عاش من شافك
ليك تاج عندي ياض
http:abgd.blogspot.com
جميلة اوى يا معاذ....
طول عمرك عبقرينو تفاصيل....
مش عارفة راى اى حد تانى
بس هى دى الحميمية والدفا اللى بجد
انا سعيدة انى لما رجعت
قريت شاى بالنعناع
تعرف انى هاروح اجربه لانى عمرى ما شربته
دندنة:
ياااااااااااهه أخيرا عندي هنا
أنا كنت مستني رأيك بجد
:)
ميرسي يا قمر على الإطراء
ومبسوط جدااا انها عجبتك يا ميوية
انا برضه حاسس بان هيا دي الحميمية
أو على الأقل
هيا دي الحميمية اللي مناسبة لموقف زي ده
لازم تجربي الشاي بالنعناع طبعااا
عيب عليكي
ده سر الحياة ده
:))))
محمد:
رايح أخد التاج أهو
بس مكسل
ده عايز رغي أوي يا ولا
وانا مشغول
بس ربنا يسهل
طبعا انامعاك انا كمان بحب اللقاءات العاطفية الطويلة الأظافر وبحب الشاي بالنعناع بس مش ناقص غير بنوتة حلوة تشاركني اهتماماتي وافكاري وجنوني
ماتعرفش نلاقيها فين دي يانجم ؟
- تحياتي ليك يا صاحبي كلامك حلو قوي
مصطفى:
منورني يا فندم
والله بقى مفيدكش في الموضوع ده
بس طالما انت بتحب اللقاءات العاطفية اللي بتخربش
يبقى اطمن
هتلاقي عدلك ان شاء الله ;)
تحياتي لك
وشكرا على رأيك
جميله وطبيعيه وحسيت انى اعده معاكو
هههههههه
عزول
ممكن امشى لو ادتنى شويه شاى بالنعناع
ريماليزا:
انتي اللي جيلة
متشكر لرأيك جدا
منورة القعدة
خدي شاي زي ما انتي عوزة بس خدي بالك من صحتك بس
منورة
:))
بجد و الله انا فاكرك كاتب الكلام هتتريق عليه
!!!!!!!!!!!!!!!!
دة اسمة على فكرة غزل صريح
و ميصحش اصلا انسان المفروض انه مسلم يكتبة
عارف الكلام اللى انت كاتبة دة المفروض حتى لو فكرت فية من غير ما تقصد
تستغفر ربنا و تقول ايه اللى انا بفكر فية ده ..
ربنا يقوينى
انما انك تكتبة هنا على انه فن !!!!!!!!!!!!
و الله انا ذهلت ...
بجد ربنا يهديك
ارجو ان ردى يكون له اى تأثير و ميكونش زعلك انا بس حبيت اقولك الصراحة مش بس انافقك وخلاص زى الباقى
إيه يا معاذ الهطل اللي قاله الأخ اللي عايزك تستغر ده
متروح كمان تطهر بمية وملح وتتوضا وتركع تستغفر علي الفحش الفظيع اللي في البوست
أمال لو أخذت البنوتة الحلوة ورحت كمان ع النيل
أكلتم حمص شام وركبتوا مركب فيها سعد الصغير بيغني العنب العنب والبنات والولاد هايصين بيرقصوا كان قال لك إيه ؟
جميل روعة اللحظات الإنسانية التي كتبتها
رائعة تلك التفاصيل شاي بنعناع وديل حصان وشعر بيهفهف
رائع بجد
جامدة بجد
عجبتنى اوى وتخيلتها اووووووووووووى
الواقع مساحة من الفقد يعبرها صوت الرواي على جناح الخيال سابحا في حلم يقظة يرسم فيه ملامح(المثال/التمثال) ويكتفي بعشق الكلمات سعيا لاقتناص المزيد منها كما يصيد النور الفراشات..
Post a Comment