اشتريت علبتين بخور
ياسمين وتفاح
هاخلليهم يملوا المكان
أنا دلوقي سايب نفسي خالص
لحد إني ممكن أطير
بس مش أمنيتي الطيران
مش أمنيتي أسمو بروحي
أو أرفرف في السما السابعة
ده مجاز عقيم
القدام بيقولوا على اللي بيعجبهم
يرد الروح
وهو ده المجاز اللي أنا محتاجه
محتاج أرد روحي
بس كده
أقعد أقوللها
تعالي تعالي تعالي
لحد ما تيجي
ونفضل هنا مع بعضينا
على طول
البخور ريحته حلوة قبل ما يتولع
لما تقربه من مناخيرك وتشمه
حزمة ريحة
لكن بتزعج وبتزكم
أنا عايز أبطل خوف
أصلي كنت بخاف أوي
ومكنتش عارف كده
وكنت بضيع كل يوم
صباع من صوابعي
ومشهد من الذاكرة
وجُمل محتاجة تركَب على بعضها
وبعدين أنام زي الحمار المجهد
من غير ما ابذل مجهود
من غير شعور بالذنب
وبيتفاقم الانتظار
البخور لما اتولع نشر ريحته بعنف رقيق
ومايع
في أرجاء الأوضة
أنا هاستخدم الكبريت
من دلوقتي
بجرأة أكبر
لازم النار تقوم بشغلها
والنار مش دائما سبب حرائق
دي النهاية؟
استنى متستعجلش
دي كمان الأوضة
بعد ما بينتهي البخور ويخلص وقوده العطري
بتتحول
لقطعة سحاب معطرة ليها حوائط وفيها زحمة أشياء
مش بس كده
دي كمان بتدي انطباع أجمل
يخلليك عايز تكون برة
وتدخلها أول ما توصل
وراحة
الصبر ده
حلو جدا
الصبر من غير انتظار
الصبر الجرئ
المؤمن بالكبريت
شكرا جدا
14 comments:
أنصحك أن تكون جريئاً
وولع ومتخفش النار مش هتموتك
واتمنى أى حاجة بجرأة
ومش مهم تتنفذ بس حاول ومتخفش
متخفش...متخفش
لو روحك راحت هتلاقى حاجة تردهالك
وركز وركب جملك وابذل مجهود ونام من غير شعور بالذنب
تحياتى
هقولك رأيي بصراحة
موضوع لذيذ موووووت
كنت ممكن أقولك كده في التليفون
بس خلي التليفون لباقي التعليق بقى
تحياتي
محمد علي
معاذ
هو سيادتك مش مراعى اننا مش بنلحق نعلق عندك
وفى ناس كسلانة زى حالاتى مش بتدخل على طول
عمتا براحة علينا ياعمنا شوية
وعلى فكرة تعبير ارد روحى بجد عجبنى جدا
ممتاز جدا يا معاذ
تحياتى
انا مش بحب البخور
بعد ما بينتهي البخور ويخلص وقوده العطري
بتتحول
لقطعة سحاب معطرة ليها حوائط وفيها زحمة أشياء
مش بس كده
دي كمان بتدي انطباع أجمل
يخلليك عايز تكون برة
وتدخلها أول ما توصل
الصورة دي مكتوبة بروعة
اديتني معنى جميل جدا
راي يا سيدي وما سيدك الا انا
يتلخص في كلمتين
.
.
شعر العامية النثري كما يطلق عليه
شعر صعب جدا جدا جدا
.
.
ماانكرش ان ليك صور حلوة
بس مش كفيلة للابهار
.
.
طالما اخترت الطريق الصعب
عليك ان تتحمل السير علي الاشواك
.
.
قديما كان الهروب من صعوبة الفصحي الي سلاسة وبساطة العامية
ثم الهروب من البحور الي التفعيلة
والاعتماد علي الوزن والقافية في عمل جلبة وشد الانتباه
.
.
حاليا اصبح شعر عموما
بكل انواع يعتمد علي ثقافة الصورة
مهمش .. خد بالك من مهمش
دور الوزن والقافية
مهمش وليس لاغي
.
.
وبما انك اخترت اقصاء الوزن والقافية تمام
عليك بالامساك علي جمر النار يا صديقي
.
.
بالفعل هناك صور رائعة .. ولكني كما قلت ليست بالقدر الكافي للابهار
اعلم جيدا انك متمرس في فنون العروض
فسابقا راجعت لي قصيدة ما
اعلم منها انك متمكن تمام التمكن في هذه الفن
.
.
صديقي
لك تحياتي والسلام
اول مرة اخد بالى انك من اوسيم
ده انجاز تدوينى يابنى
انا من مطار امبابة
يعنى جيران
نفس اللى قاله ادم
صعوبة الشعر النثري انك بتهمش
او مش تهميش مقصود
انت بتحرر نفسك من سلطة الوزن والقافية
وتخرج برة التفعيلات
وتخليلى اعتمادك بشكل اساسى على روح وصورة
وده صعب كتير لأن انت بتضطر تستغنى عن كل جماليلات القصيدة وتكثفها فيهم بشكل اساسى
عموما انا مش منظر ولا بفهم اووى بس عجبتنى
واضح انك اليومين دول موودك مظبوط وبقيت اجى هنا احس بتفاؤل بعد جو الحيرة اللى كان مسيطر ع المدونة
يارب دايماًً
..
انا اصلا جاية هنا عشان اقول حاجة تانية خالص
امبارح بليل..وانا حاطة دماغى ع المخدة والمفروض هانام يعنى
وزى كل يوم قعدت افكر ف حاجات كتير داخلة جوة بعضيها
جه ف بالى السطرين دول
"ويدعو الله الحقيقيّ
بعيدا عن أي شكوك وصور"
ابتسمت وحسيت براحة ما
بيتهيألى هافضل فاكره السطرين دول كتير
ربنا "الحقيقى" يكرمك
:)
ايه مقى ليلي دي؟
مين ده؟
موضوع حلو وجميل
والاحلي منه روحك
مبروك علي المقهي
lkar
انت ليه اتخليت عن الشجرة بتاعتك؟
وبعدين معطر الجو أحلى من البخور
جيمس:
ولعت خلاص يا برنس
تاخد نفس
صباح الخييييييير
هع هع هع هع
محمد علي:
طيب يا عم تعبت نفسك ليه وعلقت؟
المرة الجاية يا تقول تعليق على بعضه يا تقولي الكلام كله في التليفون وخلاص
ولو اننا منشفش منك تليفونات يا عسل
:)
نبض اسكندرية:
يا ستي المدونة عندك قلبي فيها كما تشائين
ومتخافيش محدش من أهل المدونة ممكن يدايقك
واديكي منورانا
:)))
نسرين:
بس أنا بحبه
ومستفيد بيه في النص ده
عموما منورة
مصطفى سمير:
سعيد برأيك يا باشا
ومنورني جدا جدا جدا
:))
مصطفى اسماعيل:
أهلا بيك وبكل أهل المطار من أول المزلقان ومحلات الموبايل لحد السلم وانت طلع وسمعني أحلى سلام أوسيم ترحب بكم
مبسوط انها عجبتك يا باشا
اقرا ردي على آدم بقى
:)
يوتا:
مش متفائل أوي قد ما انا مستريح كده شوية وجو الحيرة متقلقيش لسه موجود
......
متتصوريش الكلمتين اللي انتي قلتيهم دول
خللوني سعيد أد إيه
سعيد حقاااااااا وصدقا
لأني متخيلتش أبدا مهما شطح خيالي وهو كثيرا ما يشطح إن فيه حد ممكن يبقى فاكر حاجة من اللي كتبتها هنا وكمان صدق أو لا تصدق يفكر فيها قبل ما ينام وكمان صدق أو لا تصدق برضه يصدق حاجة منها وكمان وهنا العجب وصل منتهاه يا يوتا يبتسم ويحس براحة ما
أحيييييه يعني على رأي الإسكندرانية
بجد مش ممكن يعني
شئ لا يصدقه عقلي
وسعادة كبيييييييرة جدا تشعرني ببعض الأهمية والتفاؤل الحقيييييقيييييييييي
متشكر جدا جدا جدا
وربنا الحقيقي يفرحك زي ما فرحتيني يا يوتا يا بنت حوا وآدم يا رب
:))))
شيريهاااااان:
إيه يا بنتي مالك؟
التجديد مطلوب برضه
وبيني وبينك الدنيا كده أحسن
منوووورة
حماااااادة:
إنت أحلى يا محمد يا شقيق الروح ويا بسمة الطفولة البيضاء
الروح بتبقى حلوة لما بتكتسب جمال
وانت يا عزيزي أحد الافراد القلائل اللي بيظبطوا روحي تمااااماااا
الله يبارك فيك ومبسوط ان الموضوع عجبك يا باشا
تعالى على طول يا حضرة الإيكار
:)
Arrow:
هاللووووووووووووووووووووووو أيها الزائر الشبحي الغامض
منووووووووورة جدا جدا جدا
هو انتوا مبتجوش غير بالفضايح كده؟
لازم اقفشكوا يعني قدام أمهاتكوا؟؟؟
;)
أنا مبسوط أويييي بالكومنت ده والله متقطعيش بقى يا جميل
أنا قلت أجدد بقى بس إيه رأيك انتي؟ اللوحة حلوة كده والعنوان ألذ ومناسب لشخصيتي ولرؤيتي للمدونة بتاعتي
البخور برضه ليه سحره الخاص
مش بس عطره
اقعدي راقبي كده خطوطه وهي بتتولد شبقة ومنثنية وبتعربد في الفراغ وتسيب بصمتها العطرية الجميلة وبعدين في لحظة مفاجئة تتلاشى في العدم
سحححححرررر يا عزيزتي سحر
هستناكي في كل بوست بقى
تعالوا زورونا
باي بااااااي
آدم بك المصري:
منورني جدا يا صديقي الشاعر الجميل
الشعر يا آدم في رأيي صعب كله
الصعب في شعر القافية والوزن مش صياغته اللي تخلليه موزون ومقفى صح والصعب في شعر النثر مش استبدال الصور المبهرة بالقافية والوزن
لكن الصعب هو الشعر كله
ولا أستطيع حتى هذه اللحظة ادعاء الشعر
هي محاولات فقط لاصطياده
وهي تجارب هاااوية جدا
لذلك أريد أن أرد على نقاط معينة في تعليقك ولكن بعيدا عن النص المكتوب لأنه ليس مقياسا للنقاش فهو أضأل من ذلك في رأيي الشخصي غير المتواضع أبدا
.....
الفصحى ليست أصعب ولا أعقد من العامية أبدا
لا يوجد هروب أبدا العامية صعبة والفصحى صعبة لأن الشعر شعر بغض النظر عن لغته والشعر أصلا أمر صععععب جداااا جدا
ثانيا
لا يمكن أن يكون اعتماد الشعر على الصورة الشعر معتمد مازال على نفسه لا صور معينة ولا قافي ولا أوزان وشعر النثر لا يهمش القافية والوزن بل يلغيهما تماما وهذا إيماني الشخصي
لشعر النثر إيقاعاته الداخلية وروحه الخاصة التي تمنحه شعريته
الزحمة التي تصنعها القافية والوزن هي الزحمة التي ستصنعها الصور المجازية الكثيفة والتحرر من القافية والوزن يستدعي التحرر من أي شروط مسبقة على الشعر
قصيدة النثر خلطة خاصة جدا تصنع شعريتها بطرق عديدة ومتداخلة ربما يبتكرها الشاعر لحظيا
أكرر لك أن النص المكتوب ليس هو المقياس لأنه كما أخبرتك ليس على المستوى ولست منظرا له وإنما استغللت الفرصة وعبرت عن نظرتي المتواضعة المبدئية لشر النثر والتي ليست تنظيرا ايضا وانما تعبير عن قناعتي الشخصية المتواضعة جدا واللي ممكن تتطور كثيرا قدام
تحياتي ليك
وشكرا على تعليقك الطويل الجميل اللي خلاني قلت شوية كلام يعبر عن رأيي
:))
انا من عشاق البخور على فكرة و ريحة التفاح كمان رائعة بس ابقى جرب اللافندر هيعجبك قوى
انا مبعرفش اذاكر غير و البخور شغال كل ما واحدة تنطفى اولع واحدة جديدة
اسلوبك حلو قوى كل ما فى الامر انه عايز شوية تطوير
Post a Comment