Pages

About Me

My photo
في الغالب أنا عيل

Tuesday, June 8, 2010

بسرعة

امبارح امتحنت وحلليت كويس
بس اتسرقت
شنطتي بكل محتوياتها سلمتها وانا داخل المدرج وحطيتها جنب الكاونتر بتاع المعيدين والدكاترة جوه المدرج
وانا خارج ملقتهاش حد اكيد خدها
كان فيها اللاب توب بتاع مصعب اخويا وكان فيها موبايلي الجديد اللي لسه جايبه من اسبوع وكان فيها مفاتيح العربية والبيت واقلام وكتب وروايتين وديوان شعر وكتالوج تذكاري لمعرض نحت جميل بتفاءل بيه وبخلليه معايا على طول
انا اتقهرت في الحقيقة
حسيت اني اتعلّم عليا تماما
ومستحيل الشنطة دي هترجع ومستحيل اوصللها
حلليت وحش بعدها في الاورال بس الدكتور اللي امتحنني تعاطف معايا عشان حوار الشنطة واداني درجة حلوة بس دخلت امتحن امتحان اي سي دي ال وسقطته عشان كان المفروض اقراه بعد الاورال وقبل ما ادخل معمل الكومبيوتر على اللاب اللي اتسرق مني
رجعت مقهور ومش عارف اتكلم وعايز انام مطبق بقالي يومين بذاكر سيوتكس منمتش فيهم ولا ثانية
نمت امبارح الساعة خمسة العصر بعد ما اتغديت ولسه صاحي النهاردة الفجر الساعة خمسة بعد نوم عميق بس مليان احالام مجهدة قمت جسمي مكسر فاكر الساعة اتناشر بالليل وللا حاجة عشان اذاكر الفسيولوجي اللي المفروض امتحنه كمان ساعة ده بس للاسف صحيت اتقهرت لما لقيتها الفجر لاني مستحيل هاخلص منهج الفيسيولوجي الطويل المعقد في اربع ساعات
تماسكت لاول مرة ف حياتي وغسلت دماغي بقزازة مية ساقعة وقعدت ذاكرت شوية
على الساعة تمانية اللي هيا دلوقتي خلصت الشابتر بتاع الدم كله وحفظته ورسمت اهم رسوماته ولسه لحد دلوقتي مش عارف ده حصل ازاي
انا فرحان دلوقتي جدا باني عرفت اكمل للاخر
المفروض اني ابدا البس الساعة تسعة وربع عشان انزل تسعة ونص واوصل الجامعة عشرة الا ربع وهناك هاقرا بسرعة قبل اللجنة ما تبدا هقرا الكام صفحة اللي سبتهم عن خلايا الدم البيضا عشان كنت مذاكرهم كويس لما خدتهم في مادة الاميونولوجي
دلوقتي المفروض اقوم اراجع في ربع ساعة كل الدم وفي الفترة اللي فاضلة هخلص الدورة الدموية لحد الساعة تسعة وربع
وبشرب دلوقتي شاي بحليب وجيت اعمل اي حاجة عشان افضي دماغي واعرف اكمل بتركيز
لو حلليت حلو النهاردة في الامتحان دي نظرتي لنفسي هتتغير مليون في المية وهاحس بسعادة محصلتليش من زمان
مش عشان النجاح والسقوط كل ده هبل ميهمني وانا اصلا كده كده نازل سامر كورس في الصيف على طول
لكن هابقى فرحان عشان عرفت امسك اعصابي واعتصر جهدي واستغل كل طاقتي في الفهم والحفظ زي زمان قبل ما اخش ثانوي وعرفت انضف دماغي من كل الشوائب الغبية اللي بتفشخني لما اكون بذاكر او بعمل اي حاجة في الحياة
لو حلليت حلو
هاكافئ نفسي بمكافأة كبيرة
وهاقوللها انا بحبك
انتي كويسة
ربنا يهديكي
يا رب
يارب احل حلو

6 comments:

مُزمُز said...

واضح ان عنوان البوست ده كان معبر جدا ومؤثر ومبشر

دي اسرع نتيجة تطلع ف حياتي وتقريبا ف تاريخ جامعة مصر للعلوم والتكنولوجيا كلها

امتحنت النهاردة الساعة عشرة الصبح زي مانا كاتب كده

ودلوقتي
الساعة خمسة العصر
بفتح موقع الجامعة لقيت النتيجة بتاعت المادة دي طلعت

انا فخور بنفسي اني ذاكرت وتعبت

بس للاسف
للاسف

انا نجححححححححححححححت وجبت جيد
يا دين النبي يا جدعاااااان
احيييييييييه
انا نجحت
اشطة يا ميزووووووووووو يا تقيل يا جبار يا مولع الفيسيولوجي والبيولوجي والاميونولوجي والميكرو بيولوجي وكل عيلة الأولوجي
يا ميزو يا بروفيسيرررررر

I love Yoooooooooooooou ya sa7by I love You

You Arrrrrrreeee my heeeeeeeerrrrrroooo

لولولولولولولولللللللي

dandana said...

:)

مبروك يا معاذ بيه

ولو ان موضوع الشنطة دا فكرنى بذكرياتى الأليمة

وانا لو منك..اشعلل الدنيا فى الجامعة

بس برضو
الجيد لها طهم تانى

مبروك يافندم
عقبال اى حاجة باقية

Zianour said...

:D

مبروك يا معاذ

عقبال نور يا رب
:)

سعدية said...

الف مليون مبروك

على فكرة انا قريت البوست الصبح بس معرفتش اعلق علشان كان على الموبايل

بس دعيت لك والله ان تنجح وربنا يسهل لك الصعب

انا عايزه حاجة حلوة بقى

:))))))))))

well said...

تعيش ويسرق غيرها
قلبى عندك
وبعدين ما تزعلش انا قبل كدة فى المعهد كراسة الاجابة بتاعتى اتسرقت والإسكتر اللى عليه اسمى اتلزق فى كراسة إجابة فاضية
كنت عاوز اقولك الحلال بيرجع بس اصلى سمعتها كتير لما تلفونى اتسرق لكن التلفون لسه مارجعش
وامبارح تلفون اتسرق من الشغل مش بتاعى طبعا ..انا بتسرق مرة واحدة بس متبقاش تحط حاجة جمب الباب تانى
واسمع اغنية ابو الليف مبقاش عندى ثقة فى حد
مش عارف اى حكاية السرقة اليومين دول ولا وقال اى يقولك البلد مفهاش شغل
اتمنى ان يمتلئ قلبك بحب الله
اتمنى ان تحب نفسك
اتمنى لك الرضا
اتمنى التواصل معك
تحياتى

يا مراكبي said...

حلو البوست ده

وحلو التعليق الأولاني .. كنت داخل أقولك انك لازم تعمل تحديث وتقول ايه اللي حصل وما تسيبش الموضوع مفتوح كده

ألف مبروك

ألف مبروك بسبب تفوقك على نفسك