Pages

About Me

My photo
في الغالب أنا عيل

Sunday, December 6, 2009

تكرارية

......
انتي البنت اللي شفتها جميلة
بعيدة ومزحومة من جوه
انتي البنت اللي خللت صوابعي تترعش
وملت قلبي هيليوم
فنط فجأة لزوري زي بالونة
وفرقع في لحظة نهاية الحوار
البنت اللي خلليتني
أحتاج الضلمة الكاملة
تغطيني
عشان تهدهد الهذيان
وألجأ للنوم
عشان أكمل الفراغات بأحلام متقطعة
انتي حكاية الحب الصعبة
حكايتي الغريبة الغبية
اللي بسببها لأول مرة أفكر
إن الموت مناسب أوي لوضعي
الميؤوس منه
وأتشرب للحظة
شعور بكره كامل للحياة

9 comments:

JuSt_hUmAn said...

النهاية عجبتني قوي

الست فرويد said...

البنت اللي خلليتني
أحتاج الضلمة الكاملة
تغطيني
عشان تهدهد الهذيان
وألجأ للنوم
عشان أكمل الفراغات بأحلام متقطعة


حلو المقطع ده قوى يا معاذ

صباح الخير
:)

نعكشة said...

هي بعيد قوي كدة؟؟




سلامٌ عليك

Zianour said...

يابني

هي مش ملاكمة ولا حاجة

الموضوع ابسط بكتير

.....

المشكلة اننا نفرق بين اننا نحب او عايزين نبقى في الحالة

بس الصور حلوة

:)))

مُزمُز said...

انا مفهمتمش اعليقك يا زيانور

تقصدي ايه عن الملاكمة مثلا؟؟

Zianour said...

انا قصدت بالملاكمة الحالة اللي بيبقى فيها الملاكمين انك كل حواسك مشحوذة ومشحونة ومركزة على الوقت البسيط اللي بتستغرقه وكمان المساحة الضيقة للحلبة... بس مش طبعا الفعل نفسه الضرب في الاخر لا اطلاقا

:)))

الحب ده في رأيي زي نهر النيل -مش البحر -..انت تبتدي في المنبع في الحبشة وتطلع معاه لحد رشيد او دمياط
ساعات فيه امواج ساعات يبقى هادي ساعات بيقفد الميه وساعات المطر يعوضه ساعات الخطر موجود والمرض بس النهر يستحق والاهم النهر موجود مرئي محسوس بتشرب منه يعني الحياة ...بعطيك ويرفعك ويحضرك (من التحضر) هو ده الحب
....
اما بقى الموت في الاخر ومنه ... بيعبر عن الصعوية نعم عن الاستحالة ايون بس بينافي الصورة بتاعة النيل دي
وكمان حسيت انك استعجلت واضح انك انت لسه في الحبشة تحت في المنبع حيث النهر لسه ضعيف وبيكتمل اصبر شويتين
انت كمان لازمن ترافق النهر لحد المصب تسانده ويساندك ...شفت الموضوع صعب ازاي ومحتاج استراتيجيات تانية خالص

ده يعني لو هو النيل النيل اللي اقصده

بس طبعا ما قبل النيل برضه مهم لانك بتختبر نفسك وتكتشفها وما تبحث عنه في الاخر وكده
حظ سعيد
:))
انت ايه رأيك؟؟

مُزمُز said...

انا متفق معاكي تماما مفيش اي خلاف
كمان هو يمكن الموضوع على ارض الواقع مش مش كده دلوقتي
بس انا عاجباني ملاحظتك اللي استنتجتيها من النص ده ان انا لسه عند الحبشة تحت
القصيدة دي فعلا عمرها حوالي سنتين
متهيالي محدش داس على كلمة البنت اللي هيا بلون مختلف ف اول القصيدة دي
دي اصلا العنوان وده لينك للقصيدة اول ما نشرتها هنا
كلمة تكرارية لمجرد اني برر نشرها بس يعني
يمكن ساعة ما كتبت النص ده كان استعجال مني
او يمكن كانت حالة ضعف شديدة وعجز قاتل
وده كان صادق جدا وحقيقي ساعتها
الموضوع كان ابعد بكتير من التخيل
كاني فعلا عند الحبشة بس شايف المنابع من بعيد جدا جدا جدا جدا
دلوقتي انا بكتشف انه مع الوقت القصيدة دي اللي تخلصت منها جوايا تماما رحعتلي تاني كانها كانت نبوءة
النهر فعلا يستحق ولا زال وانا شربت لحد ما صدري قعقع

انا مبسوط بتعليقك جدا
واوعدك اني استخدم نصايحك دي كلها المرة الجاية بقى لو ربنا ادانا عمر

مُزمُز said...

عمرو
على فكرة انت علقت على القصيدة دي قبل كده زمان لما انا نشرتها وقلتلي

مبروك عليك التراب يا نازل التربة
:))))))

الست فرويد
عايز اشكرك على رايك على تواجدك الجميل دايما هنا
صباح النور ولو ان انا برد بالليل دلوقتي
بس انا لسه صاحي فتنفع برضه
:)

نعكشة
ابعد من كده كمان :D

نعكشة said...

كل شئ محتمل

ربنا قادر يقرب البعيد

:D


سلامٌ عليك