Pages

About Me

My photo
في الغالب أنا عيل

Friday, May 16, 2008

البنت

انتي البنت اللي شفتها جميلة
بعيدة ومزحومة من جوه
انتي البنت اللي خللت صوابعي تترعش
وملت قلبي هيليوم
فنط فجأة لزوري زي بالونة
وفرقع في لحظة نهاية الحوار
البنت اللي خلليتني
أحتاج الضلمة الكاملة
تغطيني
عشان تهدهد الهذيان
وألجأ للنوم
عشان أكمل الفراغات بأحلام متقطعة
انتي حكاية الحب الصعبة
حكايتي الغريبة الغبية
اللي بسببها لأول مرة أفكر
إن الموت مناسب أوي لوضعي
الميؤوس منه
وأتشرب للحظة
شعور بكره كامل للحياة

39 comments:

hanan khorshid said...

مش ممكن يا معاذ
جامد موووووووووت
بجد انت معدى جداا فى الشعر العامى
مكنتش فاكراك هتعمل حاجة فروعة " الشاى بالنعناع تانى"
حلو قوى
و صريح قوى
و بيحكى ادق الطوارىء فموضوع المشاعر ده
و احلى جزء فيه:

انتي حكاية الحب الصعبة
حكايتي الغريبة الغبية
اللي بسببها لأول مرة أفكر
إن الموت مناسب أوي لوضعي
الميؤوس منه

ايه يا بنى الاكسبريشنات الجامدة دى

.:.-=- ELGaZaLy-=-.:. said...

انتي حكاية الحب الصعبة
حكايتي الغريبة الغبية
اللي بسببها لأول مرة أفكر
إن الموت مناسب أوي لوضعي
الميؤوس منه
وأتشرب للحظة
شعور بكره كامل للحياة
----------------------------
اية الى انت بتعملة دة بس؟؟

اية يا عم الجمال دة

جميلة اوى يا معاذ

وبقالك فترة بتكتب نبذات كدة لزيزة جدااا

The Alien said...

إنه الحب يا صاحبي
هو كدا .. غبي
لكن عمر الموت ما بيكون حل

تحياتي

sara... said...

رائع يا معاذ رائع بجد

^ H@fSS@^ said...

و ملت قلبي هيليوم
؟؟؟
ده من اللي بيتقال عليه شعر ما بعد الحداثة؟؟
بجد تشبيهك جديد
يعني مشفتش حد كتب صورة جديدة ف يالكلمة و استخدمها بالجرأة دي من زمان
و فرقع في لحظة نهاية الحوار
دي كمان جميلة اوي
بجد التشبية كله من اول البالونة للفرقعة جديد
و جرش
احييك عليه
بس حكاية انك تلجا للنوم دي متخشش عليا
انت مش محتاج تلكيكة يعني يا عاشق الكسل
و القطوف الدانية

JuSt_hUmAn said...

"إن الموت مناسب أوي لوضعي
الميؤوس منه"

جميلة قوي الجملة دي يا معاذ.. وزي ما نجيب بيقول "مبروك عليك التراب يا نازل التربة!"

mostafa rayan said...

معلش بس ازاي انت بتحبها وازي هتكره الحياة بسببها طيب مانت لو مت هتفقدها للابد
مش فاهم قصدك ايه ... دة انطباعي عن القصيدة
وارجو انك تتقبل رايي

مُزمُز said...

حنان:
متشكر ليكي جدا يا جميل
دايما رافعة معنوياتي ومشجعاني

ومنوراني بتعليقاتك الجميلة دايما

:))

الغزالي:

يا باشا انت منور مدونتي بعودتك الجميلة دي

متشكر لرأيك ويارب كله يبقى جميل

بيشو:

آه ما انا عارف هو حب
بس ده غبي زيادة

تحياتي ليك

سارة:

سعيد برأيك جدا جدا جدا والله يا سارة

حفصة:

ما بعد حداثة؟؟ ايه الكلام الكبير ده؟؟؟ أنا ماليش دعوة ياختي أنا عايز أروح :)

متشكر لرأيك يا حفصة جدا

زي ما انتي قلتي كده
أنا كسلان من غير حاجة
ههههههه
وصح بامارة القطوف الدانية

بس أقصد انه بقى كسل دوبل
تخيلي بقى؟؟

:))))

عمرو:

الله يبارك فيك زعقبال عندكم جميعا :)

منور يا باشا ومشكرا لتعليقك ولرأيك

مصطفى:

لا عادي يا باشا قول رأيك زي مانت عايز
انت حاسس بلبس؟؟ وأنا كمان بصراحة
عشان كده بقول صعب وغريبة وغبية
مش عارف
يمكن لو تبصلها تاني تحس اللي عايز أوصلله عشان مبوظهاش بشرحي

منورني دايما :)

Rivendell** said...

هي كلمة واحدة

دا


تحفة



كمل يا وليدي

Unknown said...

مزموووووووووووووووووز
يخرب بيتك أيه اللي عملته في القصيدة ده
أما أشوفك بس

m.sobhy1990@gmail.com said...

بص بقى يامزمز
بماإنى عارف قصة القصيدة دى

فمش هأقولك غير

ربنا يصبرك فى مصابك الأليم

المهم تستفيد من التجربة وتطلع لنا حاجة حلوة كده


وذاكر كويس

سلام

كلام على بلاطة said...

ايه يا عم الاحاسيس
الحلة والشاعرية دى
ابدع وابدعنا معاك

jimms said...

إزيك يا معاذ
عملت إيه فى امتحان النحو

dandana said...

أيه دا....
what is this

انا عارفاها بالفرنساوى كمان بس مش فاكرة السبلينج

المهم انها حلوة
هو دا الحب اللى مافيهوش تفاهم

ولو انى مش عارفةانت كرهت الحياة وهى مش فيها معاك...ولا كرهتها كلها والسلام

المهم
انا مبسوطة انك كتبت حاجة عامية حلوة تانى ..
بس انا حابة الشاى بالنعناع اكتر

التشبيه..
وملت قلبي هيليوم
فنط فجأة لزوري زي بالونة
وفرقع في لحظة نهاية الحوار

رااائع
برافو بجد

حصان بري said...

اولا اسم المدونه يشد بجد يا معاذ
طريقتك في الكتابه نفسها مختصره وقريبه كمقهي ليلي

ثانيا: البنت اللي خلليتني
أحتاج الضلمة الكاملة
تغطيني
عشان تهدهد الهذيان
وألجأ للنوم
عشان أكمل الفراغات بأحلام متقطعة

وصف جميل بجد لحب لن يكتمل في عالم الواقع
انهزامي شويه بس حلو
تحياتي يا مزمز

vetrinary said...

شعرك جاحد
سنك صغير وواضح انك مش قارى كتير
للجيل الجديد
لو كملت باسوبك ده وبطريقتك دى
هتغير مفاهيمى فى الشعر


طعمك ف بؤ الشاى
ريحتك ف دخان السجارة
باينى حبيتك
يا حمارة

hanan khorshid said...

ايه يا معاذ انت فين
وحشنا قلمك بجد

مُزمُز said...

الأصدقاء اللي منورين المدونة
سها اللي اختفت
محمد علي
محمد صبحي
كلام على بلاطة
جيمس
دندنة

متشكرين على الحس اللي عاملينه ومعذرة على التأخير في الرد الامتحانات بقى وكده وفشخانة كبيرة جدا
وسعيكم مشكور يا عم محمد يا صبحي
منجيلكشي في حاجة وحشة

عشان اول مرة يزوروني

حصان بري:

أشكرك على قراءتك الجميلة للنص اللي لمسته تماما فعلا
واشكرك على الإطراء ونورني دايما بقى
تحياتي لك

vetrinary:

سعيد بزيارتك جدا والله يا شاعر يا جميل
ولو اني مفهمتش بالظبط ازاي ممكن هاتتغير مفاهيمك في الشعر

جميلة الفقرة اللي انت حاططها دي جدا

ومنورني جدا جدا :))

حنان:

ميرسي جدا جدا جدا على سؤالك

هو انا كنت بامتحن
وبصراحة أكتر عندي كسل تدويني
باينني دخلت حالة البيات الصيفي :))

yoyeta said...

انا هاقولك رأيى فى القصيدة بكل صراحة
هى القصيدة حلوة بس محتاجة شوية تظبيضات علشان تبقى تحفة
وانا متأكدة انك تقدر تعمل قصيدة احسن من القصيدة دى
تقبل مرورى
سلاااااااااااام

جريحـ الزمان ـة said...

انا الوحيدة التي ايقظت بك الكثير

أن الوحيدة التي بكبريائي جعلتك لا تنظلا لسواي

أنا الوحيدة التي بوجودي تتشوه باقي الوجوه

أعلم بغروري اني سيدة المكان

لكن بداخلي اني على يقين

أن لا شيء مجرد سراب اكون هنا وهناك

تجدي اليوم ولا تجدني غدا









------------------


سيدي أمتعتنا بما قرأنا من جمال التعبير

The Alien said...

أتمني تكون عملت كويس ف إمتحاناتك
وأتمني ترجع بسرعة

تحياتي

مُزمُز said...

القطقوطة الصغيرة:

شكرا لزيارتك

جريحة الزمان:

شكرا لكلماتك الرقيقة الجميلة ولزيارتك واطرائك

بيششووووو:

ميرسي يا صديقي على سؤالك
انا الحمد لله خلصت من كام يوم بس كنت مكسل ونايم بقى شوية وربنا يسهل بقى في النتيجة

شكرررااااا مرة تانية لاهتمامك وسؤالك يا صديقي الجميل :))))))

مُزمُز said...

جججججججججججججججججج

arrow said...

ازيك يا معاذ
القصيدة رائعه
فظيعه
انا مش مصدقه نفسى
انى بقرا الكلام الجميل ده
ياه حقيقى رائعة
انا عارفة انك بتكره الكلمه دى
عشان كده بقولها
رائعه رائعه رائعه


اى خدمة تانيه

سلام يا ممل
جججججججججججججججججج

arrow said...

اه صحيح اسم المدونه هايبقى ايه؟

نعكشة said...

طريقتك جديدة عليا معرفش لو حد كتب بالطريقة دية قبل كدة و غريبة
بس حلوة

دت سالم

سلامون عليك

LAMIA MAHMOUD said...

للي بسببها لأول مرة أفكر
إن الموت مناسب أوي لوضعي
الميؤوس منه


جبتها منين دي؟

Anonymous said...

أنا رأيي إن القصيدة دي عملتلك النقلة اللي انت كان نفسك فيها

حقيقي
هيا جميلة
حتى عيوبها البسيطة جميلة
لانها صادقة بشكل كبير اوي
بشكل غريب
والصدق ده ناتج عن حاجة هيا احد اسباب النقلة اللي قلتلك عليها

الحاجة دي هيا انك كنت غايص في عمق التجربة دي تماما
وسبتها تختمر وتكتمل لوحدها
وتخلق نصها اللي استثمر كل الحزن والغضب والفشل اللي فيها

زي ما انت دايما بتحب تقول :)

كمان النص ده جرأك على العامية اكتر
بعد نصين بتوع البخور والنعناع اللي منكرش ان هما صادقين وحلوين برضه لكن عيوبهم كتيرة وده يمكن لانهم اول نصين عامية تكتبهم لكن ده ناضج اكتر وفيه اختزال وصدق أكبر ووضوح في الخط اللي الفكرة ماشية عليه بهدوء وسكينة لحد الوصول للنهاية الذروة المحكمة الممهد ليها طريق قصير ومنطقي من الأحداث اليومية المصاحبة لقصتك الصعبة وانعكاساتها على أداءك

وبعيدا بقى عن القصيدة وعلاقتك بالعامية
عايزة اقوللك ان القصيدة جميلة
ولمستني بعنف
عنف يعني عنيفة مش صيغة مبالغة للتعبير عن لمسها ليا
لا
عنيفة فعلا
وجمالها يكمن هنا
العنف ملائم جدا لحالة غضبك من حياتك ومن وضعك الميؤوس منه اللي مخلليك واثق من عدم اكتمال قصتك
اللي انا مصرة انه مش ميؤوس منه ولا حاجة
التجربة مش هتغطي حياتك
التجربة هتفيدك
العنف كمان اللي في روح القصيدة قدر يكون موجود في جسمها
عن طريق الاقتضاب الغريب والسرد السريع والقفز وقساوة بعض الحالات والتعبيرات

باختصار
انا بعتبر ده انضج كتاباتك
برغم اني مصرة انك هتكمل فصحى
لازم يعني يا بابا دي سنة الحياة
انت اقرب للفصحى وبتحبها وهيا بتحبك
بس انا مستنية منك نصوص بعد ده
انا واثقة ومتأكدة غصب عنك ان انت كتبت بعد النص ده
وكتبت كتير كمان
وواثقة اكتر ومتأكدة اكتر
انك كتبت اجمل حاجاتك وانضجها بعد التجربة دي
التجربة الحياتية والشعرية

ومستنية بشغف حقيقي عشان اثبت صدق قراءتي وتوقعاتي

ومبسوطة اني زرتك
مع ان الطبيعي بييجي البلوجر ويقول زوراه مبسوط
لكن انا بجد اللي مبسوطة اني بعلق مش عارفة ليه

سلام يا جميل
واوعدني بنصوص قادمة
ونشاط اكثر
وتبقى اون لاين شوية
وتذاكر برضه عشان تيجي الجامعة بقى

:)

نبض اسكندرية said...

تسمحلى يعنى انحنيلك على الشعر الجميل دة

خلتنى فى نشوة جامدة جدا

ميرسى يا معاذ على الاحساس اللى اهدتهونى من غير ما تقصد

خالص تحياتى

hanan khorshid said...

معاذ مش امتحاناتك خلصت
عايزين الجديد
على فكرة
البورتريه الجديد جااااااااااااامد موت
اللى انت خليته بدل صورة الكافيه

dina said...

جامدة اوى و حاساها على اد ما فيها معانى كتير على اد ما بسيطة اوى
تحياتى

dina said...

معلش سؤال لازم اسأله...انا لما قلبت شوية فى المدونة و حسيت اد ايه الهدوء مسيطر عليها و خصوصا صور عظماء زى فيروز و محفوظ استغربت اوى عنوان المدونة...ممكن اعرف ليه المقهى الليلى؟
مش فاهماه

مُزمُز said...

arrow:

هاقوللك ايه يعني
مش جديد عليكي ده

:)

نعكشة:

مبسوط حقيقي ان الكتابة عجبتك

منوراني وسعيد على طول بزياراتك

لمياء:

جبتها منين؟

من غلبي :)

السيدة المجهولة:

طب اقول ايه يعني؟
انه أفشخ تعليق جالي من ساعة ما دونت
ميحرمنيش يا فندم

منورة جدا جدا يا جميل
تعالي تاني بقى مش لازم ابقى اطلب

:)))))))))

نبض اسكندرية:

ارد بايه برضه
كلامك اخجلني جدا
ومبسوط اوي اوي

:)

حنان:

انا خلصت ومخلصتش
عندي لسه امتحانات تكميلية في شهر تمانية بس مش هيا دي السبب بصراحة لكن انا مكسل شوية اليومين عن الكتابة
وعندي حاجات مكتوبة بس برضه ماليش اي رغبة انشرها ومش عارف ايه السبب للتردد ده في النشر
تقريبا حبة انعدام ثقة
ربنا يسهل :)

دينا:

شكرا شكرا جدا لرايك يا دينا

بالنسبة للاسم
انا شايف المقهى الليلي شئ هادي
الزحمة بتبقى بالنهار
انما الليل بيبقى مفيش زحمة اوي
وخاصة الليل اوي يعني بعد الساعة اتناشر

:)

dina said...

اه فعلا...دا وقت الهدوء و التفكير

nermeen said...

النص علي تلقائيته بس بيوصل اوي
عجبني بشدة
خصوصا فيه مفردات جديدة و متفردة
تحية ،،

nermeen said...
This comment has been removed by the author.
Zanooba (Zeinab sab9n) said...

جااااامدة مووووت ماشاء الله ...مدونة رائعة و كلمات صادقة مستنية جديدك إنشاءالله ....
سلاام

مُزمُز said...

دينا:

ووقت الكتابة كمان
والنوم طبعا
والكآبة

لو ليكي مزاج اقري البوست ده

منوراني دايما
:)

نيرمين:

كلامك اسعدني بشكل غريب اوي
بجد بجد مبسوط اوي برايك وبزيارتك الجميلة لمدونتي

:)))))))

زينب:

شكرا لكلامك يا زينب
يا رب دايما الكتابة تعجبك

تحياتي

:)

مُزمُز said...

دينا:

نسيت احطلك لينك البوست المقصود

http://nashwah.blogspot.com/2007/10/blog-post_30.html