احنا كبرنا خلاص
...
عمار أخويا الكبير
اسم دلعه عمّوره
ماما كانت بتقول له عمّوره
وأنا موزة
ومصعب مُصمُص
أما علي
فالسنتين اللي ماما عاشتهم معاه
حظي فيهم بأكبر كمية من أسماء الدلع
علُّولَه و لُولُو و علُلَّه
لكن سنتين بس
ميفرقوش
وهو ناسيها تماما طبعا
عشان كده منقدرش نقول إنه كان فيه حد
خد منها حنان ودلع
زي مصعب
مصعب كان دلّوع أوي
وطيب
علي وهو بيبي كان بيقول لمصعب يا ميمي
ده دليل ازاي كان مصعوبتي دلّوع ورقيق
وهو
كان أكتر واحد فينا انكسر بموت ماما
كان في خامسة ابتدائي
أنا اللي يوميها قولتله إنها ماتت
كنت ف أولى إعدادي
وحضنته ساعتها وعيطنا أوي
...
احنا كبرنا فعلا
لدرجة إن مصعب
مُصمُص
جاب لنفسه مكنة حلاقة
وسألني ووشه مضرج بالدم
ازاي يستخدمها
في المناطق الخاصة
10 comments:
قمة عالمية البرتغا الكاتب cristovao دي اغيار.
وهو ، أيضا ، وترجمت الى اللغة البرتغاليه ثروه الامم من آدم سميث.
وقد منح العديد من الجوائز.
لا تنسوا اسم هذا الكاتب العظيم ، يمكنك الاستماع اليه قريبا.
اشكركم على انفاق الوقت في الثقافة العالمية.
شكرا للزيارة
فعلا كبرنا يا مزمز
تحياتي
انت انسان جميل اوي يا مزمز
مش عارفة ليه المكتوب ده خلاني اشعر انك بتاخد بالك من حاجات صغيرة اويو حساسة اوي
انا بقى اسمي لما كنت في مصر كان عامل قشعريرة للناس
لا عارفين ينطقوه و لا عارفين مين هي و في بعض الحالات هو حفصة دي
والله مرة بتاع كاشير بيقولي مش حفصة ده كان واحد من الصحابة
اخدته على قد معلوماته و قلت له هو بعينه مافيش غيره
لكن عمري ما عرفت اخلي اسمي يبقى دلع
كتر خيرها سيرينا قالت لي انا حدلعك بالايطالي و بقت تقلي حفصوتشا
سلام
بجد يا مزمز انت هاتجننى،موضوعاتك جامدة جدا.بس هاقولك عالحقيقة........أنا بحقد عليك .ومش هاقولك سلام.
تعا تا نتخبى من درب الاعمار
واذا هنى كبرو ونحنا بقينا صغار
وسألونا وين كنتو
وليش ما كبرتو انتو
بنقولن نسينا
اعتقد ان فيروز هى الوحيدة اللى تقدر فعلا تستخبى من عجلة العمر
وتفضل زى ما هى
لازم تكبروا يا معاذ...
*********
انا مررتلك التاج عشان نفسيتك ماتتعبش...بس ابقى استندل كدا وماتجاوبش عليه
لابا:
مش فاهم حاجة من التعليق بتاتا
بيشو:
المشكلة في الحنين
منور يا جميل
:))))
حفصة:
هي مش حاجات صغيرة أوي تقدري تقولي انتبهتلها تماما وللمفارقة اللي فيها من قريب مع إن الحادثة اللي حكيتها دي من مدة
اسمك بيفكرني بالأسماء اللي الإخوان بيسموها لولادهم وأدينا قدامك أهو أنا واخواتي أبويا الإخوانجي العتيق مسمينا أسامي وارمة كلها وصعبة ومصعب خصوصا كان عنده مشاكل مع الناس اللي بتسمعه كانوا دايما يسألوه مسعد؟ وهو يقعد يصحح في مشهد كوميدي جدا وكان عنده تقريبا خمس ست سنين
إنتي اسمك ممكن ياخدله أسماء دلع كتير يعني
بس حفصوتشا جميل والله ومميز جدا
منورة
:)
Arrow:
الله يخليك/ي
ليه بس الحقد خليك/ي طيب/ة
وبعدين معرفتش إنت/ي مين؟
أنا عايز أعرف بجد
عموما أنا هقولك سلااااام
:)))
دندنة:
لازم نكبر طبعا مفيش شك
بس زي ما قلت لبيشوي المشكلة في الحنين
:)
هو احنا زماننا اللى استعجل؟
وللا احنا كبرنا وبندارى؟
طب ليه مش قادر تستوعب؟
ما تكونش كبرت ومش دارى؟
(ده على فكرة جزء من قصيدة لأحمد عبيد)
يعنى ساعات نصحى كده من النوم خير اللهم اجعلة خير
ونلاقينا كبرنا
هو واقع وكل حاجة
وحقيقة
لازم نتقبلها
================
عشان أول زيارة ليا
عايزة أقول شدتنى جملة شوبنهاور
عشان أنا كاتباها ف كشكولى بتاع الحاجات دى
ومن الجمل اللى مابانساهاش
ثانياً شدتنى صورة كاميليا
لأن مش ناس كتير تعرفها
ثالثاً بأه
اتخضيت من عدد الكتب اللى انت مسجلها
قريتهم ف اد ايه
وقعدت تكتب فيهم اد ايه
آه بالمناسبة كتب نيتشة والناس دى بتلاقيها فين؟؟
:)
يوتا:
منوراني جدا والله ومبسوط بزيارتك
المشكلة مش إننا بنكبر فجأة طبعا
أكيد لأ
متهيألي المشكلة
بنستوعب فجأة
بالنسبة لكاميليا
دي المطربة الأولى عندي
أعرفها من سنة ونص
ومن ساعتها سحرتني
ومبطلتش أسمعها
سواء ألبوماتها الأربعة الجميلة مع صابرين
أو مشروعها الفذ البديع الشاهق
وميض
أدندنها طول الوقت
وأسمعها أكثر من سماع من يعيشون حولي
بالنسبة للكتب
مش كتيرة أوي
فيها كتير روايات
معظمها يعني
أما الكتب التانية فتعتبر مشهورة وضرورية
أنا مش بقرأ كتير والله
كل شهر مبعرفش أخلص أكتر من كتاب وكام رواية
حتى لو خلصوا في أسبوعين وقعدت باقي الشهر فاضي ممكن مقرأش فيه حاجة
كتب نيتشه وسارتر من مكتبة المصطفى على النت
كتب الصوفية الكبار بعضها من المصطفى برضه وبعضها وارثه وطبعات قديمة من ايام جدي
والروايات المكتوبة كلها متوفرة في كل حتة متهيألي
بس كده
نورتي المدونة
وأتمنى تنوريني دايما
انا جيييييييييييت
معلش متأخرة شوية
هي تدوينات "الشجرة" جلها متعلقة بالجذور التي نمت بداخلك و انت خايف ان أوراق ربيع العمر "العشرين " تنسيك فيها
لا تخف
بس كدة
عامل ايه معاذ؟
:)
ندى:
انتي كنتي فين يا حاجة
أظن زيك كده برضه
أنا كويس الحمد لله
نورتيني
:)))))))))
Post a Comment